1 İYUN – UŞAQLARIN BEYNƏLXALQ MÜDAFİƏSİ GÜNÜ: GƏLƏCƏYİMİZİN ETİBARLI TƏMİNATI

Balaxanova Qumru Vasif qızı,
ADPU-nin baş müəllimi b.ü.f.d.

Hər il 1 iyun tarixində qeyd olunan Uşaqların Beynəlxalq Müdafiəsi Günü bəşəriyyətin ən qiymətli sərvəti olan uşaqlara diqqət və qayğının ifadəsi kimi böyük əhəmiyyət daşıyır. Bu gün yalnız bayram deyil, həm də uşaqların hüquqlarının qorunması, onların sağlam, təhlükəsiz və firavan şəraitdə böyüməsi istiqamətində cəmiyyətin və dövlətin məsuliyyətini bir daha xatırladan mühüm bir çağırışdır. Uşaqlar hər bir xalqın gələcəyidir. Onların fiziki və mənəvi sağlamlığı, keyfiyyətli təhsil alması, milli-mənəvi dəyərlərə bağlı, vətənpərvər və savadlı vətəndaş kimi formalaşması ölkənin gələcək inkişafının əsas təminatlarından biridir. Məhz buna görə də uşaqların müdafiəsi və hərtərəfli inkişafı dünyanın bütün sivil dövlətlərinin prioritet istiqamətlərindən hesab olunur.

Ümummilli Lider Heydər Əliyev uşaqlara xüsusi diqqət və qayğı göstərilməsini dövlət siyasətinin mühüm istiqamətlərindən biri kimi dəyərləndirərək demişdir: “Uşaqlar bizim gələcəyimizdir, gələcəyimizi nə cür tərbiyə edəcəyiksə, ölkəmizin sabahı da elə olacaqdır.” Bu dəyərli fikir uşaqların tərbiyəsinin və inkişafının yalnız ailənin deyil, bütövlükdə cəmiyyətin məsuliyyəti olduğunu aydın şəkildə ifadə edir.

Müasir dövrdə uşaqların hüquqlarının müdafiəsi beynəlxalq hüququn əsas istiqamətlərindən biridir. Təhsil almaq, sağlamlıq xidmətlərindən istifadə etmək, təhlükəsiz mühitdə yaşamaq və öz potensialını reallaşdırmaq hər bir uşağın fundamental hüququdur. Bununla yanaşı, dünyada baş verən müharibələr, sosial bərabərsizliklər, yoxsulluq və digər qlobal problemlər milyonlarla uşağın həyatına mənfi təsir göstərir. Bu səbəbdən uşaqların müdafiəsi istiqamətində beynəlxalq əməkdaşlığın gücləndirilməsi xüsusi aktuallıq kəsb edir. Azərbaycanda uşaqların hüquqlarının qorunması və onların rifahının yüksəldilməsi dövlət siyasətinin mühüm tərkib hissəsidir. Təhsil və səhiyyə sahələrində həyata keçirilən islahatlar, sosial müdafiə proqramları, uşaq və gənclərin hərtərəfli inkişafına yönəlmiş layihələr ölkəmizdə sağlam və savadlı nəslin formalaşmasına xidmət edir. Bu istiqamətdə həyata keçirilən tədbirlər Azərbaycanın gələcəyinin etibarlı təməllər üzərində qurulduğunu göstərir.

1 İyun – Uşaqların Beynəlxalq Müdafiəsi Günü hər birimizə mühüm bir həqiqəti xatırladır: uşaqlara göstərilən sevgi və qayğı gələcəyə qoyulan ən dəyərli sərmayədir. Uşaqların hüquqlarının qorunması, onların istedadlarının üzə çıxarılması və xoşbəxt gələcəyinin təmin edilməsi hər bir cəmiyyətin mənəvi borcudur. Çünki bugünün uşaqları sabahın qurucuları, elm adamları, müəllimləri, həkimləri və dövlət xadimləridir. Bu əlamətdar gündə bütün uşaqlara sağlam, xoşbəxt və işıqlı gələcək arzulayır, onların daim sevgi, qayğı və diqqət əhatəsində böyüməsinin vacibliyini bir daha vurğulayırıq.